عيال ........................

و كنا عيال .. بنتقاسم فى لقمتنا
بنتخاصم و نتصالح
و نجرى لما فوق الشمس
تعدى بينا ضحكتنا
ما نلحقش العشا جايز .. ما نوصلش الفطار يمكن
لكن جوانا كان شبعان
و كان إنسان
بيحلم بالبنات الحور
بيحلم بالدفا كلمة
و يسعى كالفراش للنور
و راضى تسعده نسمه
و كان عيل .. بيجرى قد ما يجرى
غيطان الشمس ما تهده
و وقت الليل عينيه صاحية
تناجى فى القمر وده
و وقت الفجر ما يشرق
بتلقاه نور .. يغنى يجرى يتمايل

و لا يميلشي لأرض الزور
و يشرب فى الصباح ندعة
من البركات
و عند الظهر بيقيل مع الأموات
و لا يخافشى من المخلوق
و لا يهابشى غير الخالق
و دايماً فى الكلام صادق
ما هو عيل
* * *
و كان عيل
فى وسط الضلمة متونس
بلابل قلبه بتغنى تلم طيور
و تلعب ويا بعضيها
و تدارى من الغربان
و تسكن جوه عش حنان
فتبدرها فى غيط قلبى
و تزرع ألف شمعاية

حفان فضة
و تلضمنا عيدان قاعدة
بنتوضى
ندور فى القلب مش داريين
و انا دارى كانت ساكنة ف تل بخور
بتحلم بالوصال بينهم
و تسرج فى الضلام عينهم
و لا تطفيش نيران قادت فى يوم فيا
يا عود أخضر دخلت فـ قلب دنياتك
بدون ميه
بقيت درويش
و عشقك فى القلوب ضايع و لا يبكيش
دموعك فى الغُنا ترانيم
و حرفك فى الوجع تناسيم
نسايم عمرك الراجع و لا بتحكيش
عشان عيل
* * *

و كان عيل .. بيسرق م الفضا صمته
و يحرق فى الغرف طاقته
و يسجن كل هفواته
فى بير محفور و مدارى
* * *
و إيه فاضل من العيل
و إيه باقى . . . !
ماعون فاضى . .
و أرض غريبه و شراقى
بيتأمل ضياع عيل
و موت عيل
و حلم جريح . . و متكوم ..
مالوش معنى و لا ذكرى
صحيح زادت سنين عمره
و احلام السنين طابت
لكن بارت
و وقعت منه فى السكه

[ندعوك للتسجيل في المنتدى أو التعريف بنفسك لمعاينة هذا الرابط]