الفجر لما يحين ميعاده
بيشق فى الليل الخلاص
و الطلق يسبق شقشقة الميلاد
زقزقة العصافير
و أم محمود ماليه البيوت بالونس
و الأغانى مبسملة حبة سبوع
و النار تقيد فى ظهر كل الأمهات
مسامير حَدادى
و الدمعة بتراود الأمل مولود
اسحبى يا بت نفسك يمِّتى
ما تصرخيش
امتى الميعاد يا خالة أرتاح و أترحم
لحظة يريد ربك يفتح فى الجدار
و الضحكة تملا وشها
" شدى حيلك "
و انتى يا زهرة أغلى مية و دلدقى
باين عليه واد و شقى
أمور كمان
ابقى امنعى عنه الجيران
و انكريه
بسم الله و لا فلقة قمر
قومى يا صالحة و اقعدى على بطنها
لاجل الخلاص با بنتى نقدر نزنقه
و تفوق زكية
يا هلة الفرح الندى
قومى اقعدى
قولى لعينك تختشى
لا تحسديه
سمى عليه و اديله صدرك يعرفك
و لا ينساكيش
ما تعيطيش
ربك بيرضى المحرومين
إخزى الشيطان
و أوعى الزعل
مولود حلالك بخريه
لحظة حنانك تفرده
و تمطعه ..
و تطلعه يقدر يواجه الحياة . . .
21/5/2001
[ندعوك للتسجيل في المنتدى أو التعريف بنفسك لمعاينة هذا الرابط]
الجمعة أبريل 11, 2008 10:07 pm