1- الطموح
لو تفكر تبقى طير مفرود جناحه
فوق شواشى الشجر
تنكسر ..
ينقص ريشك
تتربط على جذع شجره
تضطر .. آسف .. تنتحر
2- حلاوة روح
لما تاخدك ألف طاقة نور و تفرح
تتشابك خيوط العنكبوت
و الإخطبوط يرسم دواير مقبرك
همك يدوب جوه روحك يعصرك
و نوصلك تخرج براسك م القبور
و الإخطبوط واقف على القبر الحزين
يخنق فى فجر .. إنك تكون ...!
3- المرايه
لو شُفت نفسك جوه نفسك
حقك تموت مقهور
فات القمر
و الحلم فوق شجر الكافور
و إنت اللى مشلول البصر
متكسح الرغبات
و مطفىّ قلبك بالبكا
فى شرخ السكات
4- حقيقه
القطه لما تجوع بتاكل فى العيدان
و الفار بينصب مصيده
و الأم تخنق حلمها
تعشق جمالها بنفسها
فتموت ما تشعر بالزمن
5- إعتذار
معذره يا سيدى
لو قلت إنك م العبيد
و العذر مرمى فى التاريخ
و أنا مش راح أصرخ جوه جوفك م المرار
و لا راح أبرر الإعتذار
إنما كل السنين أتمردت
على كونى أقدم إعتذار
30/3/1991
[ندعوك للتسجيل في المنتدى أو التعريف بنفسك لمعاينة هذا الرابط]
الجمعة أبريل 11, 2008 10:17 pm
