شبابيك الضلمة

[ندعوك للتسجيل في المنتدى أو التعريف بنفسك لمعاينة هذا الرابط]
شبابيك الضلمة
إلى أحد ضحايا الوطن والفقر(الغير لائق اجتماعيا) الدبلوماسى الفذ /عبد الحميد شتا
.............................
الساعة يدوب بالظبط
وانا والصمت
والنيل والكوبرى والاسفلت
النيل تعبان وبيتاوب
الهوا زهقان م الدخان
وعفار الشارع
السما بتحن وبتندع من عنقودها
وعمود النور يفرك ف عنيه
والليل طالع
بيوت العز بتتلعق لعيون الفقرا
السور اللى مابين الناس والناس
صامت وخجول
البرج العاجى المتعالى
النور الهربان من شبابيكه الضلمة
مش عارف يجرى يروح على فين
وانا لسة بمد ف خطاوية
آخد بإيديه
كعبلنى الحلم وقومنى
على دمع عنيه
كان حلم جميل
مش عارف يبدأ ليه منين
مليانة عنيه بكلام فاض لى
وأتارى الوجع اللى ف قلبه
من نفس الداء
تمتم بكلام مفهمتوشى
فات حضنى وأخد الحزن معاه
ولقيت خطاويه واخداه لوراه
وعنيه ف عنية بتتأمل
بتقوللى كان نفسى نكمل
ولحد ما لمس السور كعبه
طلَّع من جوة الروح قلبه
وحدفهولى .. قاللى بوصيك
تفتح قلبى على باب روحى
لما تضلم كل الشبابيك
ميشوفش السر الا حبايبى
عرلهم ورلهم قلبى يمكن أرتاح
وف لحظة لقيته وقف ع السور
حاضن حزنه
والنيل كان ناصب عينه عليه
وفاتح حضنه
من خوفى صرخت
قام طبطب من على كتفى الصمت
ولقتنى لوحدى
أنا والنيل والليل
والكوبرى والأسفلت