مقاطع شعرية من ديوان عرضحال

مقاطع شعرية من ديوان عرضحال
......................
من غير مدد

الناس تعوزها
ف الوسع تلاقيها
وياك بميت لسان ولسان
ولما تبدأ تنغرز ف الصعب
وتخش الميدان
كله بيجرى وينفلت
يزرق بعيد
وتعيش وحيد ف أزمتك
من غير مدد
ولا ريق حنان

الحبال الدايبة

الحبال الدايبة بينا
كان بودى تمتَّنيها
إنما انتى مُصِّرة
تقطَّعيها وتفصليها
بس خدى بالك ياغالية
اللى فاضل حبل تايك
لو تشد إيديكى طرفه
تبقى فعلا فضِّيتيها

ناس كتير

فى ناس كتير بتحب
موت .. عشق الحياة
وناس كتير عايشة
الحياة كارهاها موت
وناس تموت علشان
تكون طوق النجاة
وناس تعيش بس
الحياة .. علشان
تموت

طرح الرماد

النار بتاكل كل شئ
حر وجميل فينا
معدش فاضل أى شئ
بنحبه حوالينا
طفح الخراب
وهم وسراب
صبح الرماد طرحنا
وحصاد تقاوينا