تابع مقاطع شعرية من ديوان عرضحال

[ندعوك للتسجيل في المنتدى أو التعريف بنفسك لمعاينة هذه الصورة]

تابع مقاطع شعرية من ديوان عرضحال
...........................
معدش شئ

معدش أخ .. ولا ابن عم
معدش لحم .. معدش دم
معدش حلم .. معدش علم
معدش حرب .. معدش سلم
معدش صمت .. معدش صوت
ولاعاد حياة ولاعادشى موت
معدش شئ من أى شئ
غير الكلام
غير أمة باعت عرضها
جابت عيالها
ولاد حرام

نبل ريقنا بالحياة

ياللا بينا أنا وانت نقدر
ع الحياة ونرُجَّها
تختلط أرواحنا فيها وتلاقيها
يدوب عسلها ف مرها
نبتدى نغير طريقنا
نبل ريقنا بالحياة
قبل ما يسبقنا موتنا
ويباغتنا على دماغتنا
يدُكَّها

العساكر

لسة فاكر
لما كنا صغيرين
واحنا بنخاف م العساكر
بعد حبة .. كبرنا حبة
فهِّمونا
أن دول اخوات أبونا
بعدها بشوية أكتر
ابتدى خوفنا الصغير
تانى يكبر
وابتدينا برضه تانى
خوفنا من نفس
ا ل ع س ا ك ر

بحر المحرومين

طعَّمت قلبى بالحنان
وحدفته بحر المحرومين
وبعد فيمتو ثانية كان
حوالينه ملايين ملمومين
الكل راح ع الطعم
قام شد وبلع
مبقتش قادر أشد مين
واطلع بمين