قلبى على ولدى

[ندعوك للتسجيل في المنتدى أو التعريف بنفسك لمعاينة هذه الصورة]


قلبى على ولدى

قلبى على ولدى انفطر
وقلب ولدى ليه حجر
لابيراضينى ولايواسينى
ولا يراعينى بعد الكبر

شيلته ف قلبى و شيلته
ف عينى وحواه جوفى
واتلقيته فرحة بتطرح
جرحى وخوفى
خدته ف صدرى وقلت
ياعينى إتملى وشوفى
ولاكان عشمى.. وعمرى
يضيعوا هدر

عاش ف هناوته جوة
عذابى وشافه وعرفه
كان محتاج لى وانا ف شبابى
وهوَّ ف ضعفه
واهو دلوقتى العكس
بيحصل والشخصين اختلفوا
عشت انا ضعفه وهوَّ
اتقوى قلبه عليَّه
وفاتنى وهجر

الأيام دوارة وبكرة
حتدوق نارى
والديان حيعيد الذكرى
وياخد تارى
وتقول يا امَّة الحق عليَّه
مكنتش دارى
سامحى جنينك حبة عينك
قلبه انكسر
مهما بتعمل مش بستحمل
شر يصيبك
ولربى بادعى انا واتوسل
يهديك يابنى ويستر عيبك
دانت ضنايا .. وكل منايا
يبقى الخير بختك ونصيبك
وتعيش طول عمرك متهنى
أسعد من كل البشر
قلبى على ولدى انفطر
وقلب ولدى عليه حجر