محمدالتمساح
عدد المساهمات : 16
تاريخ التسجيل : 02/03/2009
 | موضوع: كامل عيد عاش  الإثنين مايو 04, 2009 5:28 pm | |
| كـــــامـــــــــــل عــــــيــــــــــد
(عاش)
قصيدة مهداة إلى روح فقيد الأدب والأدباء
وشاعر مصر والسويس الكبير أ/ كامل عيد رمضان
................................................
كامل مجاش الندوة دى ليه؟
حد يرن له .. أو يتصل بيه
حد يعرفه إن احنا مش حنبتدى
غير لما يوصل عندنا .. ونطمُّن عليه
الراوى ع القهوة وكامل لسة مرحلوش
الوقت عمَّال يعدى وبرضه مجلهوش
الراوى قال مش حمشى إلا اما ييجى كامل
واهو يوم ورا يوم بيعدى
وبرضه مقابلهوش
مفتاح كامل مظبوط على حداشر
يكون ف قلب الباب و ف ريحه
والحاجة مستنظرة ودنها دقة خطوته
ورنة وشخللة مفاتيحه
الصالة متوضبة..والقاعدة مترتبة
تتلقى أغلى حبيب
والكل فى صمته المريب مستنظر
دخلته الحلوة وبهجة تفاريحه
لما تعدى من شارع الشهدا
إخلع قلبك .. دغدغ أحاسيسك
غمض عينك جامد
وافقد كل مشاعرك
وان مقدرتش بعد ده كله يموت وجدانك
سد ودانك واصرخ جامد واهرب
من أول فتحة تقابلك
عمارة الخليل وشارع الشهدا
وقهوة أبويوسف .. وحسن بتاع الجرايد
كل يوم بيصبَّحوا عليك وانت رايح ووانت عايد
ولما غيابك طال عليهم
طافت عنيهم المدى تدوَّر عليك
حلفوا ما يعودوا إلا بيك
ترجَّع الروح للشوارع .. والحوارى
والمعانى ..والقصايد
ياريس البحرية مركبك
على شط القنال واقفة
رافضة القلوع والطلوع
من غير كفوفك تحضن الدَّفة
مستنظراك ياولد
ومين غيرك تجيب فارس
ومين غيرك تجيب رُبَّان
يلم ف حضنها الأوطان
ويهجر ضفة الأحزان
ويعبر للأمل ضفة
دليل الرُخام اللى حيشيل
إسمك العيَّاش
نفسك المؤمنة .. قلبك الدافى
حسَّك الجياش
مش حنكتب فيه
بكل ذرة ف روحنا وف دمنا
كامل عيد مات
حنكتب فيه
كامل عيد عاش.. كامل عيد عاش | |
|
عبداللطيف مبارك
Admin
عدد المساهمات : 888
تاريخ التسجيل : 07/04/2008
| | موضوع: رحم الله الشاعر الكبير كامل عيد الإثنين مايو 04, 2009 11:59 pm | |
| | |
|
