الباقي هو الله
مش يمكن الخسران
والضرب ف الغوطان
يجلب عليك اللوم
وأنت وكام غلطان
م اللوم ملهش حيطان
علي فيك الانسان
واكبر علي الأحزان
اصحي لروحك فوق
الشط كله شروق
روح للحنين فرحان
يا قلب ايه وجعك ..؟
أكتر من الأول
الهم ومطول
والشوف خلاص له بيان
وأضرب وغيب او موت
ف الصمت نبني بيوت
ونشد حيل التوت
لو طرحه حياني
ندخل طريق الروح
نار الجواب بتفوح
ولا قلت أه ياني
فتروح وليه رايح ..؟
أغطس ف قاع الموت
وأعشق وطن ف سكوت
بكره هيبقي زمان
ونصلي ع الهادي
سمعني أية نوح
ومريم العدرا
لسه السنين خضره
وأسجدها للرحمن
جنب البيان تبيان
والفرق ف الاحسان
عز العزيز ف الحق
حقك تقول أنا ....لأ
وأنا حقي أقول كلمه
مش تشبه النسمه
ولا تشبه الحران
أنا برضه ليه زمان بأقول عليك شيطان
واللي قرا اللي كان
كان عارف اللعبه
ألعب مع التاني
ودوس ف شوك صاحي
هتشرب انت الضنك وأنا شوقي لصباحي
فارقه لكن واضح
مين م العيال فالح
والوجه لو كالح
مايهز ف جناحي
طاير أنا طاير ولحد فين ساير ومادومت مش حاير
هتضمني جناحي
أمشي يادي الغارقه
هي السنين سارقه لساها ف المكتوب
أمشي دروب ودروب
ولا فر م المكتوب
مهما تاخدنا ذنوب .. بنتوب لوجه الله
يقبلنا بالرحمات
ونبات وفينا أيات للذنب لأجل نتوب
ونكون عباد الله
ماتصلي ع الهادي ولم خلقاتك
الفقر لو فاتك ما تبقي غير فقري
ما في معني لحياتك غير المرور دوغري
طقطق لنا ودانك
وشبر الرايق
مافي حد مدايق غير اللي قلبه سواد
وشم حبه الفهم
وأخرج من الدايره
ماهي الحياة سايره ف دايرة الملكوت
تنقص وأيه يعني..؟
وتزيد ما ينفعني ,غير اللي شد الحيل
والصبر أخره جميل
دنيا يا موت دنيا
ماهي كلها فانيه والباقي هو الله
ــــــــــــــــــــــــــــــــــــــــــــــــــــــــــــ
أحمد أبو سمره
السويس في الجمعة 26/11/2009
الخميس ديسمبر 24, 2009 12:44 am