مسرحية أيوب المشهد الأول

النص المسرحي



أيـــــــــــــــــــــــوب
للمؤلف
أحمد أبو سمره
















[ندعوك للتسجيل في المنتدى أو التعريف بنفسك لمعاينة هذا الرابط]
الشخصيات
1- ناعسة : هي الشخصية التراثية وتمثل كل الوطن سواء السويس أو مصر
2- المطرب : هو مطرب الضمه السويسي الذي يشارك في العرض
3- أيوب : صوت للمعني
4- الحمال : هو أحد الذين يطمعون في ناعسة ولكنه يتعاطف معها
5-عنجهه : هو ذراع الشر الذي تنفذ قدرية من خلاله جبروتها
6- زهرة : احدي نساء البلدة التي تقف ضد ناعسة
7- صابحه : احدي نساء البلدة والتي تساعد ناعسة بفاعلية بعد أن تؤمن بقضيتها
8- مسعدة : زوجة سعدون التي تردد ما يقوله زوجها وتكتشف أنه كاذب فتقف مع ناعسة
9- نعناعة : امرأة محرضة لكل جانب
10- قدرية : هى نموذج الشر والحقد من ناعسة
11- سعدون : من أتباع قدرية وزوج مسعده
12-شهيد : 4,3,2,1 وهم نماذج للذين ضحوا من أجل مصر والسويس
13- فرد 5,4,3,2,1 من أهل البلدة
14- فتاة 4,3,2,1 من أهل البلدة
15- بائع السوداني – بائع الترمس- بائع أم الخلول
16- الحاكم : هو الذي يحرك الأحداث ويقف مع الشر
17- جمهور يترك له الحوار



















المشهد الأول
المنظر.......... فرح سويسي وبه ضمة الغناء والجمهور يلتف حولهم , الشباب في جانب
والفتيات في جانب أخر , والمطرب يغني وباعة الترمس والسوداني والسريديا
وأم الخلول يتجولون بين الأفراد في الفرح وأثناء الغناء تدخل ناعسة من جهة الفتيات
وهي تحمل أيوب المعني فوق رأسها وتنتشر رائحة المسك في أرجاء المكان , يشم
الجمهور رائحة عطن ويتوقف المطرب عن الغناء وعندها ينصرف في إضاءة لايت
وتستغل بيوت الساحة في السينوجرافيا )
بائع السوداني.... الحمش .. سوداني السوداني.
بائع الترمس..... لوز .. يا لوز .. البليلة
بائع أم الخلول... البحر وافانا بخيره .. والله دا كتر خيره
والرازق هو العاطي مولنا ومفيش غيره
طازه وعال يا أم الخلول .. حلوة وعال يا أم الخلول.. غني يا أستاذ
المطرب....... سير .. سير .. سير 000 سير يا نسيم الصبح بلغهم سلامي
سلام من فوق سلام تابع سلامي
سلام حليان حلي عود الريحاني
سلام من فوق شجون البحر عشقه
( تخل ناعسة من جهة الفتيات والمطرب يترك الساحة ويخرج)
فرد 1 ........ أنت يا بتاع أم الخلول , إيه الحكاية أمال ؟ بآيته عندك من أمتي؟
البائع ......... صابحه وفللي , طعمه والهي .. الريحة من عند حد تاني يا عم ( ينادي) طازه
وعال يا أم الخلول
فرد 2 ....... المطرب راح فين ؟ ( يسأل الجمهور) ما حدش شاف المطرب يا جماعة؟
( تترك تلك المساحة لأر تجال الجمهور مع وضعي الممثل في توقع أي حوار)
جمهور 1 ........................................................................................
جمهور 2 ........................................................................................
فرد 3 ...... المطرب أهو ( يشير عليه خارج جماعة التمثيل )
المطرب... في إيه؟
فرد 2 ... أنت سيبت الفرح وكنت فين؟
المطرب ... كنت بتكيف
فرد 3 ...... إيه ؟
المطرب... بتكيف ... فيها حاجه دي
فرد 3 .... طب غني وعيب ... خلي الليلة تصهلل ونفرح العريس
المطرب... حاضر..( يغني وكأنه الراوي)
ولأنها عاشقة الولد صيناه 00 ف القلب مداري وعايشة معاه
دا يره علي كل القلوب تنده 00 أيـــوب صبر والصبر ذاد محلاه
ولا حد عارف قيمته غير هي00 ولا حد شايل حملها هي
الكل عنها بعد ودراعها عمره ما كل
ساكتة لكن مش رضا 00 دي صرخة مكتومة
والخوف عليها لتنفجر في الكل
ناعسة ( تتحرك بمفردها) عمري ابتدأ وياك .. فوق خدي تبسيمك
صوت أيوب( وكأنه من فوق رأسها) أنطقي بالأه يمكن تريحني

ناعسة ... الأه متطلعشي مهما الزمن طول.. أنت الأمان يا أيوب ولا عنك أتحول
صوت أيوب... الناس ماترحمشي وحدتك طالت .. أنتي ف عز الصبا .. شوفي نفسك
مع غيري , وديني الشـــط0
ناعسة ... معاك يا روح الحياة , يا للي الإله شرفك وبلاك دونن ع الخلق, للشط
نوصل وهناك نلاقي وعدنا
( يدخل الحمال في تشكيل من خارج ساحة التمثيل لعربة يجرها حمار)
الحمال... حا.. حا يا حمار .. أطلع شي بتشم ف إيه؟ .. ياااه .. دي ريحه وحشه قوي
يا ساتر يا ست أنتي ورانا ورانا0
ناعسة ( وهي في المقدمة) غريبة أنا اللي وراك برضه
الحمال ( بانفعال) طب عدي عدي... أنتي مش شامة حاجه ؟ !
ناعسة( بهدوء) ريحة مسك
الحمال... عندك زكام , ولا عملتيها , ولا......
ناعسة... ولا إيه يا عديم النظر والذوق ؟! أنت وغيرك عارفين اللي معايا إيه ؟
الحمال ... أنتي مين؟
ناعسة.... مرات أيوب .. وأم الولاد
الحمال .... بس أيوب وناعسة .. حكاية وخلصت
ناعسة.... أنما أنا دم ولحم بيتحرك , والحياة بتنبض ف قلبه , والزمن قلاب
الحمال ... ريحته مالها معطنه يا ست؟
ناعسة ... دا مسك ... أنت اللي ما بتشمش
الحمال... وليه الغلط... مش أنتي اللي طرد وكي من الفرح الثاني
ناعسة ... بعينها
الحمال ... بيقولوا انك نحس !
ناعسة ... نحس! ... كتر خيرهم ... ليه نحس؟
الحمال... علشان مش عايزه تتاوي العضم اللي معاكي في القبر, صحيح ..
ليه مش عايزه تتاويه في القبر وترتاحي؟
ناعسة ...دفن الحي معصية ... والعضم فيه الرعشة والروح بتجري فيه
الحمال... شوفي.. النسوان أنواع .. نوع نهاق ونوع رقاص ونوع نكدي , إنما أنتي نوع
بيتمناكي كل راجل .. ست صابرة , ما تسيبك منه وتيجي نتجوز .. وترتاحي
من الغلب
ناعسة ... تبقي حمار مفهمتش حاجه .
الحمال ... فعلا حمار.. حمار اللي أتجوزت اللي مزعلاني عمال علي بطال والأغرب .. إنها
رفاصة وقماصة .. ما قولتلكيش ( يجلس بجوارها) ما تحرقي شويه .. نتجوز أبعد
عنك الغربان .
ناعسة ( تقوم من جواره) يا ويل اللي يقرب مني
الحمال... ( يحاول الاقتراب منها) أنا مستعد أتلسع لسعه ترد الروح
ناعسة... أحفظ أدبك وأتلم .
الحمال ... أنا قولت حاجه يا ست .. أنا بأقول ليه الطبيعة تكشر علي قليل البخت!
ناعسة ... محتارة .. فين الحظ؟!
الحمال... الحظ عندي تابع وأنا خدام... طلباتك إيه؟
ناعسة ... طلباتي عشه نداري فيها.. ورغيف عيش وميه
الحمال ( يضحك ) بتقولي عشه ؟ ... ما فضل فيها ولا شبر.. اللي لهف أهو لهف.. ومش ولاد
البلد اللي جم بعد الهجرة ... ما نلتم ونبقي عزوة .
ناعسة ... يادي العيبة .... مش الأصول يا معلم
الحمال ( برد فعل قوى ) يبقي مفيش عشه
ناعسة ( بأنكسار) معلش عمر الكريم ما ينضام .. والصبر أحسن دوا ( يمشي في اتجاه وهي
تمشي في الأ تجاه العكسي باكية وتغني )
لفيت كل البيوت .. ما لقيت مكان لأجل العليل يفرح
الجرح كمكم , ومش راضي كمان ينسد
ليه حظي فيكي ما ألقليش مطرح
والدمع واقف في العيون حيران
والخطوة تقلت ومش قادرة كمان ع المد
الحمال ( يعود لها مسرعا) ملكيش ديار يا ست
ناعسة ............. مقطوعة من شجرة
الحمال ( بأسي) والشجرة
ناعسة............... كانت كمان حجرة تقسي ف المخاليق
الحمال.............. والنيل
ناعسة ..............ما بيروي غير بقرة
الحمال ............. والبقرة
ناعسة............... مانعه هناك الشوف , جف الغنا ع الريق
الحمال .............الضيف .. مين أهله؟
ناعسة.............. هجوا عشان جرحه ... وقادوا فيه حريق
الحمال.............. طب وأمه
ناعسة ............. أمه كمان وأبوه .. من جرحه قاموا فاتوه
الحمال............. دول دمه .. دول لحمه
ناعسة(تصـرخ) أيــــــــــــــــــــــووووب.. لفين الصبر هيا خدنا في نار وعذاب
الحمال ........... أيوب ...زمان
ناعسة ............ أيوب زمان كان نبي
فتاة1 ............... أيوب هنا المسكين
فتاة 2 ............. أيوب وشد الغطا
شاب 1 ........... أيوب وشال الطين
ناعسة ............ أيوب حصان وأصيل, أيوب يا قلبي عليل.. وبعلته صابر
مأمور ومش أمر
فتاة 2 .............فوق راسه كام عيلة
فتاة 3 ............ كان ليه ضليلة
ناعسة ........... وبأيده كان بيجود
الحمال ( يحاول أن يتذكر) فاكره زمان خالص
شاب 2 .......... بيه كنا نتوانس
المجموعة ..... والتوتة كات روحه , ما تروحي بيه حداها, هتطيب فيها جروحه
ناعسة ........... أوصل هناك أزاي .. أوصف لي يا أسمك .......
الحمال ..........شلبي.. خدامك شلبي
ناعسة .......... أوصف لي يا شلبي... ريحني أنا وقلبي
شلبي............. هتعدي منها أزاي , إيه اللي جابك هنا؟ ( يلمح قدرية من بعيد) دي جهنم الحمرة
قدريه مش راح ترحمك.
ناعسة .......... وأروح فين ؟ ... بأحب نسمتها , قالوا لي ميتها هي اللي فيها الدوا .. أبويا وأمي
مدفونين فيها .. موصوف للعليل يشرب ويروي العطش .. وأنت اللي قايل مش
حد تاني
شلبي ....... عيونها كتير .. مولعة كل قلوب البشر منك .. المال بقي السلطان في البلد دي خلاص
الكل باع ... عنجهه هو اللي متحكم فيها .. نصيحة مني .. ارحلي
ناعسة( تتنهد ) عزيزة أرض الجدود
المطرب............ حكم السنين تفضلي ماشيه... تخذي الوجع بين الضلوع والروح
وحاشية قلبك بالأمل حاشية... دمع الحزين ساعة الألم مسمـــــوح
ما تصرخيش م القهر ابتسمي ... الظلم حتما مسافر والعليل يروق
والجاي لينا صفا لون الأمل والبوح
( إظلام )
المشهد الثاني
( ناعسة تمسي بين الظل والضوء بينما عنجهه لا يميزها)
عنجهه........... سبحان الخلاق.. يا بدر حسنك ع الخلايق طل.. والضحكة فوق خدك تقول الله
هي المحروسة مش من هنا؟!
ناعسة ........... أمشي في طريقك عدل أحسن لك
عنجهه ( في نفسه ) باين عليها متعر فش مين عنجهه ( لناعسة ) أنا عنجهه يا بت .. يسموني
الشفاط .. إيه ؟ متعر فيش قط البراري المتعتق
ناعسة ............ أوعي تقرب مني .. خاف لدغة الحية
عنجهه............. مش أقوي من قرصة التعبان ( يقترب منها ويتحقق من شكلها فيعرفها فيحدث
نفسه) يا نهارك أسود .. أنتي رجعتي تاني .. لو سيبتها تقعد ينكشف الملعوب
نخبي بضاعة السوق ونقول دي مجاعة ( يردد أباطيل قدرية ) أتاري المية
بتخس .. والسوق حاله واقف.. والنسوان هاجره جوازها .. ريحتك هلت عليهم
انكشحي من هنا ولا..... أجيبك اللي يخلص عليكي
ناعسة ............. أعلي ما في خيلك أركبه
عنجهه( ينادي) يا نسوان الحارة .. جالكم النحس ( الفتيات يشخصن النساء)
مسعده ........... فيه إيه ياسي عنجهه؟
عنجهه ............ جوزك راح ... سعدون راح يا مسعده
مسعده......( تصرخ) يا خرابي
عنجهه............ يا بت يا صابحه
صابحه........... أيوه يا عنجهه
عنجهه........... جوزك ضاع
صابحه.......... يا سبعي راح فين؟
عنجهه( يشير إلي ناعسة والنساء تتجمع حولها) هي دي سبب اللي أنتوا فيه
مسعده ............ أنتي..!
صابحه ........... إيه اللي جابك تاني..؟
نعناعه............. كل اللي شافك أتمنا كي.. جنسك إيه, عجينتك إيه؟
ناعسة ............. عيب يا ست
مسعده ............ الراجل يشوفك ينساني , فيكي إيه مش فيه؟( تنادي) يا زهره تعالي
زهره( في حالة من التو هان وعيونها زائغة ) ...في إيه؟
مسعده ........... أدي الست اللي جوزك سرح وراها مارجعش
زهره ( تبحث عنه) راح فين .. سابني ليه .. ؟ أكل منين يا ناس , أرجع لأهله أقول لهم إيه؟
مات .. فين جثته؟ فيه الروح .. فين مكانه؟
ناعسة.( تدفع يدها بعيدا) ... هأشرب من دمك لو جيتي جنبي
زهره ........... سامحوني يا أهل السماح ( تروح في غيبوبة فيحملها الفتيات )
المطرب يغني......... وحملوني من فوق أربعة .... نحو المصلي يا أخواني ودوني
صلوا عليه صلاة بلا سجد .... صلاة سليمــــــــان بن داوود
نحو الأرافة يا أحبابي ودوني .... نحو الأرافة بالذكر يا حزني
وأنزلوني دورين بلا عتب .... وسندوني بألفين عامـــــــــودي
( تنتبه زهره وتجري عليها ناعسة وتمسك تلابيبها )
ناعسة........... قولي جوزك فين ؟
زهره............ جوزي حبسته قدريه و عنجهه..
ناعسة............ ليه؟
زهره............ قالوله يقتل ناعسة ومقتلها ش
ناعسة........... شوفوا الحق .. ليه ضايع بينكوا الحق يا ظلمه ( تغني)
لو له تقاوي كنت أزرعه في غيطان
الحق ضايع , وفوق منه ضمير ميت
الصدق دا يما ينجي م الغلط خاطي
قولولي فين أزرعه وأكبر مافيكوا واطى
( تصرخ ) فين قدرية؟
المجموعة....... بتلف عليكي الدنيا عشان تموتي
وتحط ف عينك غــــــــــــــل
سلطت الطل عليكي يـــّــــبرد
سقتك المــــــر ف مليون سطل
قدرية النار الحارقة لكل شفا كي
شــــــــاب...... أرحــــلي وأرحمي أيوب
ناعسة........... مش هارحل ...
أنا قاعدة
راح أونس عين الحق بذكر الله
أنا قاعدة
وغطانا الصدق وحـــــد الله
بيني وبين الموت
شــــــاب.......... مكتوب .... ألحقي أيوب
ناعسة............. أيوب الضحكة الدبلانه بتجلجل صدري
أيوب الصرخة العطشانة للنيل يوم يجرى
أيوب مش وهم.... أيوب إنسان
متعشم يشفي من الرحمن
ومدام الناس بتخالف شرع الله.. وأيوب ف القلب
الظلم يا هد قوايا ..يا هــــــد قواه
عنجهه ............ قومي يا زهره .. جوزك لقيناه مسموم ع الطريق.. ناعسة سقياه ولحقه الحكيم
( تنهض معه ويخرج)
نعناعة.............. يا بنت الناس خدي أيوب وارحلي ( تتجه لمسعده) هي القادرة عايزه منها إيه؟
مسعده.............. لمي الكلام أنتي لسه صغيرة ... بكره تعرفي
نعناعه.............. يبقي عنجهه راجل بوقفته ليها
صابحه............. قولي عامل راجل( تضحك)