•
ضــــلع أعـــــوج أشعار ....أحمد ابو سمره
في 05 أكتوبر، 2010، الساعة 02:43 مساءً
(مدخل)
مسامحتكيش..
القلب من غيرك يعيش
يازاد وداد
الروح وهاد
البعد عاد عندك مليش
======
صبيت كاسات من دمعي وسقيت رموشك
والقمر خد الطلــوع
الرمش زقطط بالدموع
وطار بعيد عند النجوم
والروح تئن من الحنين
الغولة واقفه جنب شباك المرور
ماسكة الضلوع
والضلع الأعوج ينكســر
والقلب من خوفه يبوش
===
لميت ف روحي وف ركن فاضي كان ركن
الجرح مش لاقي السكن
ولا لاقي حتى صوت يرجرج ف القتيل
مين علمك تطفي اللي كان يحلم بنور...؟
وتحطي فوق كتفه النحيف صخرة بعاد
مين علمك دبح الوليف وتخنقي عطش الطيور..؟
عنيكي من غير الدموع صحرا الحياه
ياألف آه ع الحلم لما يكون سراب
والطير حزين والريش مفيش
===
كنت بأشوفك وأنتظر منك سماح
الفرق بين قلبين مش محتاج لقارب
محتاج لنظرة تقـــربه
أو يوم أنا لميت جراحك
تتذكريه........
الفرق بان اول ماشوفتك
بتخونيه...!
ولايوم عملتي حساب لروحك تهجرك
أنتي اللي بيعتي لون خدودك للغريب
والقلب ساكت من آلامه بيعتصر
دلــق الحنين علي ضلع كان ملهوف عليه
طار الحنين ورفض يرد ف الضلوع
كلمة سماح
والطوق....
وحبل المشنقة.....
والروح بتخرج من دوائر الانتظار
ســم المحبه يفر يدخل في العروق
يلمح هناك.....
رمشك بيرقص ع الجنازة
وكان سعيـــد
الخميس أكتوبر 14, 2010 8:35 am
