مسرحية صلوات الحنة............... الشاعر أحمد أبو سمره

[ندعوك للتسجيل في المنتدى أو التعريف بنفسك لمعاينة هذا الرابط]
الشخصيات
______


- الراوى والراويه 000 شخصيات تفتح الحكاية وتذوب فى الممثلين
- قطر النـدى 000 ابنة خمارويه تاريخياً وفتاه مصريه تجسد الوطن الأنثى
والأنثى الوطن
- مصــرى 000 شاب عاشق لقطر الندى
- شــــــوق 000 شاهده على الحكاية
- خمارويه 000 أبو قطر الندى ثم كل أب فى الروايه
- أبو الشوف 000 مجذوب الحكاية
- طاهـــــر 000 شـاب فقـير
- بردائوش 000 رجل عربى مسن يملك المال
- فلفــل 000 أبن بردائوش
- الشيخ أبو على 000 رجل كفيف يملك ظرف المشايخ
- سيدوسع 000 من أتباع فلفل
- زاهيه 00 روايح 000 نسوه من الشعب مع قطر الندى
- داهيــه 000 أمراه من الشعب مع وجهة النظر المخالفة
- عمــار 000 أبن بلد صديق الشيخ أبو على
- الجــرف 000 نموذج السيل الجارف لإهدار القيم
- فضل المحلل 000 نموذج النفعى الذى يظهر عند الضرورة
- مجموعة شباب وفتيات تشارك فى الحكاية
- فرقه الغناء حسب ظروف العرض
- الاغانى الموجودة فى النص من التراث السويسى وتدخل المؤلف باضافات تتماشى مع موضوع العرض 0

" تبدأ الفرقه فى الاستعداد للغناء حول الدائره ويدخل المطرب "
المطرب ( يغنى ) الحنه يا حنه يا قطر الندى
المجموعة " منشغله فى ترتيب نفسها و البعض يتحدث كلاً مع الأخر ولا يرد أحد "
قائد الفرقه : إيه يا جماعه فيه إيه ما لكم ؟
المجموعة : فيه إيه يا ريـس ؟
المطرب : ما تردوا
فرد 1 : الأصول يا أستاذ إن حضرتك تنبهنا
فرد 2 : وتقول مستعدين وتتفق معانا
قائد الفرقه : بتقول إيه يا خويا !
فرد 3 : أيوه نتفق الأول
قائد الفرقه : فيه فرقة تراث فى الدنيا بتتفق ساعة الشغل أمال البروفات اللى عملناها كان ايه لزمتها ؟
فرد 4 : يا أستاذ أى فرقة فى العالم ليها اشاره معينه تبدأ بيها
قائد الفرقه : أمال ايه اللى حصل !
فرد 2 : المطرب بتاعك داخل غُنا منه لنفسه
فرد 3 : تصدق وتآمن بالله
قائد الفرقه : أمنت بالله
فرد 2 : انك راجل قمع ( ضحك جماعى )
القائد : قمع 000 مقلوب ولا معدول
فرد 4 : بيخر يا أستاذ ( ضحك جماعى )
فرد 1 : بيخر أيه انشاء الله
المجموعه : بيخر نغم يا أستاذ ( ضحك جماعى )
قائد الفرقه : طب ياله ياجماعه عشان نغنى ( يدخل الأول )
الراوى : وأزاى يا أستاذ تبدأ و أنا غايب ؟
قائد الفرقه : ما أنت طول عمرك غايب يا سيدى ، فيها ايه يعنى ؟
الراويه : أعترض 000 أنا أعترض على الكلام دا
قائد الفرقه : ليه بقى يا أختى يا فلحوسه
الراويه : لانه دا الغايب الحاضر
قائد الفرقه : غايب حاضر مش فاهم
الراوى : أنا اللى وسط الناس موجود بأحساسى
الراويه : يظهر فى وقت الندا 0 فاكر ومش ناسى
الراوى : بأحكى عن الحاصل
الراويه : ويشد فى الاسماع
الراوى : وبأروح بعيد خالص 000 أرجع معايا الشوق
الراويه : نبـدأ يا ناس بالغنـــا 000 تحلا الحكاوى نفوق
قائد الفرقه : أبـدأ يا أبنى
المطرب : الحنـــه يا حنـــه يا حنـــه يا قطر النـــدى
يا شـباك عريسـنا يا عــينى جـــلاب الهوى
يا خــــوفى مــن أمـــــــــك لتــدور عليـــك
لأحـطك فى عـينى يا عـينى وأتكحل عليـك
الفرقه : الحنـــه يا حنـــه يا حنــــه يا قطر النـــدى
المطرب : يا خــــوفى مــن أمــــــــــك لتــدور عليـــك
لأحطك فى صدرى ياروحى وأزرر عليـــك
وإن جــم يســـألونى عــــــن ضحكـة عينـك
راح أحلف وأقـول ياحبيبى ونكيـــد العــدا
الفرقه : الحنـــه يا حنـــه يا حنــــه يا قطر النـــدى
الراوى : جـلا جـلا جـلا جـلا
الراويه : اللعــب أصبــح فى الخـــلا
الراوى : من غـير كلام بنقول كلام
الراويه : الكلمه تقطع فى الحقيقه تهزها وتخوف البوم واللئام
شاب 1 : أفرد كلامك وأحسنه 000 لسانا ناقصين فى العلام
فتاه 1 : طب ليه كده تبدأ كلامك بالنكد !
الراويه : الكل لازم ينتشى ونحقق الفرجه التمام
الراوى : (يتجه الى الشاب) حاضر يا أخينا نعيد كمان ونشد فى قلوع الزمان
(يتجه الى الراويه) إيه فى الجراب قولى طلعى 000 شرط إن
يا دندش تسمعى صوت الزمن دا مالوش حدود
الراويه : ( تضحك ) ما أحنا هنحكى عن الفرح
شاب 2 : وعروسة تفرح بالعريس
فتاه 3 : الكل يفرح أو يهيص
الراوى : الواد خميس فاتح قميصه للدفا 000 بيلم كل الفرحانين صُبح الجُمع
وتقيد سراير بالدفا جوه البيوت
الراويه : ألفين عفا ع الصحبه لما تكون عسل
الراوى : إخى عليها لما يملاها الكسل 000 الكلمه ليكى يا غنوتى 000 طول
ليلى بأحلم بالنهار 00 عش وعروسه ولقمه بتقوت جعان ريح قلبها
شاب 3 : أنا مصرى عاشق عشها وفداه نموت
شـوق : أنا شوفت شوقه وهو باصص من بعيد وسمعت دقات قلبها
شاب 3 : قطـر النــدى
شـوق : قطر الندى 0000 فى عينها بيطل النهار فرحان قوى مليان غُنا
الكورس : فى عينها بيطل النهار مليان غُنا
شـوق : والتوب الأخضر طرحته زاينـه 000 الجبين فلقة قمر
الكورس : فلقــة قمــر
شـوق : تفرد اديها تجيب هناك ألفين صباح 000 وتمد خطوه تبعتر الخير
ع القلــوب
الكورس : وتمد خطوه تبعتر الخير ع القلوب
شـوق : أوقات كتير بيحط فوق شباكها بوم أسود لئيم 000 تفضل كما المهره بتحرن ع الغريبَ وتطرده وتعود أمان
الكورس : هى كما المهره بتحرن ع الغريب وتطرده
فتاه 2 : أنا شوفتها شامخه كما شجر النخيل الشعر سايب ع الكتاف
يطرح بلح
شـوق : لو كنتى منها تقربى 000 كانت تحطك جوه عينها وتحضنك
وتهّدى قلبك تزرعه طهر وحنان ( تتجه الى شاب )
فيه ايه جرا لك يا الجدع !
شاب 3 : أيوه يا خاله 000 قصدانى أنا ؟
شـوق : شيفاك مخبى فى فكرتك كام مسأله000 أسأل يا ولدى
عندى الاجابة
شاب 3 : الشوق فى عينها مختشى 000 وواخده دايما ع البكا
فتاه 3 : وأنا لما بأسمع حسها 00 يملانى غيظ مين اللى جرح فى الخدود ؟
فتاه : ( تشخص قطر الندى ) مش هى دى 00 المسأله 00 أنت بتبعد بالسؤال قرب وشوف وأنا لما أقولك شوف كلامى هأصدُقك
ولا ها دارى
شاب 4 : ليه سيبتى مصرى ؟
قطر الندى : دا كان عيونى اللى بتلمع فى الحياه 000 أنا عمرى يوم ما نسيت
هواه بس الحكايه مش بأيدى
شاب 3 : ( يشخص مصرى ) قطر الندى
قطر الندى : أبعد يا مصرى عن الحرس
مصرى : راح يعمل إيه يعنى الحرس ؟ وأنا م الحرس00
قطر الندى : طول عمرهم بالسيف يقطع فى الرقاب
مصرى : دا أحنا أحباب مش جاى طمعان فى الولايه
قطر الندى : ما بيفهموش غير فى العقاب
مصرى : بأعشق عنيكى تفيض أمل 000 وأنتى مسافره للمُحال
قطر الندى : علشان بقلبك مؤمنه بتحبنى
الكورس : مش واحدهُ بس 00 اللى بهواكى وأنفــتن
كل القلوب الطيبه مليانه من عشقك عذاب
تيجى ديابه وتروح ديابه وأحنا بحسنك مشغولين
قطر الندى : عرفاهم أهلى الفلاحين
شاب 4 : والصيادين والنجارين
فتاه 1 : والبمبوطيه 000 حتى عمال الطحين
قطر الندى : مين عرفك يا مصرى قول مين عرفك ؟
مصرى : شايف الجمال فوقها الهدايا محمله 00 ومنادى بيقول ع الخليفه العريس